من 2012 داخل المتحف — والحكاية لسه في أولها

درست الآثار اليونانية والرومانية، ودرست جنبها الإسلامي والقبطي والبيزنطي والمصري القديم — لأن الإسكندرية نفسها مش بتعرف تفصل بينهم. المدينة دي طبقات فوق بعض، واللي بيشتغل فيها لازم يقرا الطبقات كلها.

شغل أمين الآثار مش زي ما الناس متخيّلة. مش بس حراسة قطع ورا زجاج. ده شغل يومي في التسجيل والتوثيق وحالة القطعة والعرض — ومين هيقف قدّامها بعد كده ويفهم إيه.

ومن داخل الشغل ده اكتشفت المشكلة الحقيقية: المعلومة موجودة، بس بلغة بتبعّد الناس. فبدأت أحكي بالعامية على السوشيال، وبعدين في بودكاست، وبعدين قدّام كاميرات ومنصات. أول أمينة متحف مصرية تقدّم اليوناني الروماني بالعامية — مش لأن ده هدف، لكن لأن حد كان لازم يبدأ.

وجنب ده، بنظّم ورش فسيفساء. لأن اللي بيقعد يقص الحجر ويركّب القطع واحدة واحدة، بيفهم اللي عملوا الأرضيات دي من ألفين سنة أكتر من أي كتاب.